Serbski ludowy ansambl

Lube Serbowki, lubi Serbja a přećeljo Serbow!

Profesionelne serbske hudźbne jewišćo hižo nimale šěsćdźesać lět ke kulturnemu žiwjenu našeho ludu słuša. Ja so jara wjeselu, zo směm po lětdźesatkach wukubłanja, studijow a skutkowanja jako hudźbnica a managerka zwonka Łužicy wotnětka w swojej domiznje w zamołwitym zastojnstwje k dalšemu wuwiću tutoho wulkotneho wuměłskeho herbstwa přinošować. Wysoka kultura je drohotne kubło a njeparujomny wobstatk tworićelskosće našeho ludu a našich přećelow druheje narodnosće.

Wosobinsce sym zbožowna, zo móžetej mojej dźěsći dźakowano mojemu nowemu nadawkej w Serbach dale wotrosć. Moja třilětna dźowka Elena Sophie je so hižo derje w serbskej pěstowarni zažiwiła, a mojemu dwanaćelětnemu synej Korla Elia so na serbskej šuli jara lubi. Wón hraje róžk – kaž ja – a móže so tule pod dobrymi wuměnjenjemi w swojej maćeršćinje zaměrnišo wukmanjeć hač na našim poslednim bydlenskim městnje w Kölnje.

Ze swójbnych a powołanskich nazhonjenjow sym sej wědoma, što stej najwjetšej aktualnej wužadani Serbskeho ludoweho ansambla: Serbsku rěč zaso do srjedźišća stajeć a serbski dorost spěchować. Runje naša wysoka kultura dyrbi kruće we wšědnym žiwjenju našeho  regiona a našeho ludu zakótwjena być.

Bolostne podawki minjenych měsacow w zwisku ze SLA su nam wšěm znazornjeli, zo ma naš ansambl hišće wulke rezerwy, nic jenož hladajo na swěrne wobkedźbowanje serbskosće. Mamy k wědomju brać, zo tuchwilu z městnami hišće akceptancu našeho poskitka w Serbach klaca. Na jewišću njeje hižo najwjetša móžna ličba rejwarjow prašana, ale ćim bóle swojorazny profil w formaće, kiž so tež za turneje přez wjeski hodźi. Wězo mam sama wjele idejow, ale Was wšěch wutrobnje přeprošuju, zo byšće nas ze swojimi nastorkami a z wotewrjenej kritiku přewodźeli!

Bych so wjeseliła, hdy byšće na nowy cyklus měsačnych swójbnych koncertow na wulkej žurli SLA přišli. Prěni termin budźe 5. septembra w 16.00 hodź., druhi 10. oktobra w 16.00 hodź. Dźěćom, ale tež dorosćenym so instrumenty, chór a balet předstaja. Nadźijam so při tutej składnosći tež rjaneje bjesady z Wami!

Wutrobnje Was strowi
Waša
Milena Vettraino
intendantka